1.- Por experiencia histórica, temos constancia de que a falla de consulta e de participación do profesorado foi a causa principal do fracaso parcial das distintas reformas educativas posteriores a 1978.

2.- Da lectura do Anteproxecto parece inferirse que a LOE postula a redución de carga horaria das materias filosóficas e a eliminación do seu carácter común e obrigatorio dentro da ESO e do Bacharelato, reiteración de erros xa cometidos noutrora por anteriores gobernos en  comparanza co vello Plan de BUP-COU. De se confirmar o deterioro da  Filosofía na LOE, esta propiciaría alumnos e alumnas adestrados en reflexos pavlovianos publicitarios reiterados antes que no esforzo intelectual.

3.- Parécenos obvia a contradición entre as xa eliminación, xa redución, xa modificación, que afectarían ás disciplinas Ética-Filosofía I-Filosofía II, por unha parte, e alguns dos fins da LOE: “a) …pleno desenvolvemento dos alumnos” e “d) …desenvolver a creatividade, a iniciativa personal e o espírito emprendedor”, ademais de co 1º Principio Xeral da LOE que postula o Bacharelato non só como propedéutica para a vida e capacitación “para acceder á ensinanza superior”, senón tamén como síntese para “incorporarse á vida activa con responsabilidade e competencia”.

4.- Procede pensar que a erradicación da Filosofía II (Historia da Filosofía) do currículo común e obrigatorio conduciría á involución cultural co reacionario horizonte de formar autómatas no canto de humanos autodeterminados.

5.- Se se persiste en reforzar a implícita e desnortada división Letras/Ciencias e en liquidar a Ética, a Filosofía I e a Filosofía II da formación común e obrigatoria dos estudantes de 4º de ESO e de 1º e 2º de Bacharelato, o Anteproxecto da LOE empobrecería substancialmente a educación académica, que se decantaría estruturalmente e estratexicamente polo produto do estudante-fotocopia, reprodutor acrítico e descontextualizado do que outros investigaron e publicaron. Cun tufo ideolóxico rancio de súbditos monárquicos en troques de cidadáns críticos con saber práctico e autónomo.

Consecuentemente co antedito, os Profesores e Profesoras dos Departamentos de Filosofía dos Institutos de E. S. de Galicia

A.- Rexeitamos sen reservas o Anteproxecto da LOE verbo do inmotivado maltrato horario e curricular anunciado para as disciplinas destes Departamentos.

B.- Reivindicamos a permanencia e a condición de obrigatorias e comúns da Ética, Filosofía I e Filosofía II para todo o alumnado, ademais do mantemento das actuais disciplinas optativas dos nosos Departamentos.

C.- Estimamos que as posibles novas materias a incorporar pola LOE en ningún caso poden conculcar as disciplinas filosóficas, historicamente consolidadas e eficientemente fecundas na emancipación e no progreso da humanidade.

D.- Constatamos que calquera reforma educativa está condenada ó fracaso sectario e tecnocrático de ser realizada sen contar coa opinión máis cualificada dos axentes principais da educación académica: os Profesores e as Profesoras.

En Pontevedra (Galicia), a 3 de xuño de 2005.

Por autorización expresa dos Departamentos de Filosofía dos Institutos de E.S. de Galicia ue se indican a continuación, asina o Presidente-Coordinador da Aula Castelao de Filosofía ,Apartado de Correos 332, 36080 Pontevedra,(aula@aulacastelao.com, www.aulacastelao.com., fax 986868081).

Asdo.: